Monthly Archives: ஜூன் 2016

மாறனேரி நம்பி

ஸ்ரீ:
ஸ்ரீமதே சடகோபாய நம:
ஸ்ரீமதே ராமானுஜாய நம:
ஸ்ரீமத் வரவரமுனயே நம:
ஸ்ரீ வானாசல மஹாமுனயே நம:

alavandhar-deivavariandan-maranerinambi

ஸ்ரீரங்கத்தில் ஸ்ரீராமானுஜர் சன்னிதியில் சிற்ப வடிவில் எழுந்தருளியிருக்கும் ஆளவந்தார் (மத்தியில்), தெய்வவாரி ஆண்டான் மற்றும் மாறனேரி நம்பி

திருநக்ஷத்ரம்: ஆனி, ஆயில்யம்

அவதார ஸ்தலம்: புராந்தகம் (பாண்டிய நாட்டில் இருக்கும் ஒரு கிராமம்)

ஆசார்யன்: ஆளவந்தார்

பரமபதித்த இடம் : ஸ்ரீரங்கம்

ஆளவந்தாருடைய தயைக்கு பாத்திரமான சிஷ்யர் மாறனேரி நம்பி. இவர் நான்காவது வர்ணத்தில் அவதரித்தார். இவர் தன் ஆசார்யன் ஆளவந்தார் மீதும், பெரிய பெருமாள் மீதும் வைத்திருந்த பற்றைப் (அன்பை) பார்த்து ஸ்ரீங்கத்தில் உள்ள அனைவராலும் மிகவும் மதிக்கப்பட்டார்.

இவர் குணங்கள் மாறனைப் (நம்மாழ்வரைப்) போலே இருப்பதால், சில நேரங்களில் இவரை மாறனேர் நம்பி (மாறன் + நேர்) என்று அழைக்கப்பட்டார்.

இவர் ஆளவந்தாரிடம் எப்பொழுதுமே காலக்ஷேபம் கேட்பதிலே முழு ஈடுபாட்டுடன் இருந்தார் என்பது நாம் அனைவரும் அறிந்ததே. அதுமட்டுமல்லாமல் இவர் எப்பொழுதும் பெரிய பெருமாளுடைய குணானுபவத்திலே மிகவும் ஈடுபட்டிருந்தார். இவர், தான் மற்றவர்கள் மீது வைத்திருந்த பற்றை (அன்பை) விட்டு ஸ்ரீரங்கம் கோயில் ப்ரகாரத்திலேயே வாழ்ந்து வந்தார்.

மாறனேரி நம்பி தன்னுடைய அந்திம காலத்தில் பெரிய நம்பியிடம், தன் தேஹ பந்துக்கள் அனைவரும் ஸ்ரீவைஷ்ணவர்களாக இல்லாததால், இந்த திருமேனியை (பூத உடலை) அவர்களிடம் ஒப்படைக்க வேண்டாம் என்று கூறினார். அது மட்டுமல்லாமல் அந்திம க்ரியைகள் அனைத்தையும் பெரிய நம்பியையே செய்ய வேண்டும் என்று கேட்டுகொண்டார். அவர் இந்த உடலை ஹவிஸோடே (யஞ்யத்தில் ஸமர்பிப்பது) ஒப்பிட்டார். அதாவது எப்படி அது பகவானுக்கு மட்டுமே ஸமர்பிக்கத் தகுந்ததோ இதுவும் அப்படியே என்றும், அதை எப்படி மற்றையார்கள் தொடக்கூடாதோ அதே போல் இதையும் மற்றையார்கள் தொடக்கூடாது என்று கூறினார். பெரிய நம்பி இந்த நியமனத்தை சிரஸாக வகித்து, மாறனேரி நம்பி பரமபதித்த உடன் அவருக்கு சரம கைங்கர்யத்தைச் செய்து முடித்தார். இதைப் பார்த்த அங்குள்ள ஸ்ரீவைஷ்ணவர்கள் அவருடைய (மாறனேரி நம்பி) வர்ணத்தினால் குறைவு என்பதால், இவர் அந்திம க்ரியைகள் செய்தது தவறு என்று கூறி, எம்பெருமானாரிடம் சென்று குறை கூறினார்கள். எம்பெருமானாருக்கோ பெரிய நம்பி மூலமாக மாறனேரி நம்பியினுடைய பெருஞ்சிறப்பை நிலைநாட்ட வேண்டும் என்ற ஆசை இருந்தது. அதனால் அவர் பெரிய நம்பியிடம் சென்று “ஏன் இப்படிச் செய்தீர்?” என்று வினவினார். “அடியேனோ சாஸ்திரங்கள் மீது ஒவ்வொருவருக்கும் நம்பிக்கை வளர வேண்டும் என்று சில காரியங்களைச் செய்தால், தேவரீர் எதற்காக இப்படி ஒரு காரியத்தை சாஸ்திரத்திற்கு முரணாகச் செய்தீர்?” என்று எம்பெருமானார் பெரிய நம்பியிடம் கேட்டார். அதற்குப் பெரிய நம்பி “பாகவத கைங்கர்யத்திற்கு நாம் வேறொருவரை நியமிக்க முடியாது. நாமே தான் செய்து முடிக்க வேண்டும். அது மட்டுமல்லாமல் ஸ்ரீ ராமன், ஜடாயுவிற்கு அந்திம க்ரியைகளைச் செய்தான். நான் ராமனை விட உயர்ந்தவன் அல்ல, இவரும் ஜடாயுவை விடத் தாழ்ந்தவன் அல்ல, அதனால் அடியேன் இவருக்கு செய்த கைங்கர்யம் ஒன்றும் தவறு இல்லை. நம்மாழ்வார் அருளிச்செய்த திருவாய்மொழியில் “பயிலும் சுடரொளி” (திருவாய்மொழி 3-7) மற்றும் “நெடுமாற்கடிமை” (திருவாய்மொழி 8-10) பதிகங்களில் பாகவத சேஷத்வத்தை பற்றி மிகவும் சிறப்பாகக் கூறியுள்ளார். அது வெறும் தத்வார்த்தம் மட்டும் அன்று, நாம் ஆழ்வாருடைய தெய்வீக வார்த்தையை நம்மால் இயன்ற அளவு பின்பற்ற வேண்டும்” என்று கூறினார். இதைக் கேட்டவுடன் எம்பெருமானார் மிகவும் சந்தோஷத்துடன் பெரிய நம்பியைச் சேவித்தார். பிறகு பெரிய நம்பி செய்தது உன்னதமான செயல் என்று அறிவித்தார். இதைக் கேட்ட அனைத்து ஸ்ரீவைஷ்ணவர்களும் மிகவும் சந்தோஷப்பட்டார்கள். இந்த அழகான ஸம்பாஷணையை, மணவாள மாமுனிகள் பிள்ளை லோகாசாரியருடைய ஸ்ரீவசன பூஷனத்தில் உள்ள 234வது ஸூத்திரத்தினுடைய வ்யாக்யானத்தில் மிகவும் அருமையாக விளக்கிக் காட்டியுள்ளார்.

நம்பியினுடைய வைபவம் வ்யாக்யானங்களில் சில இடங்களில் எடுத்துக் காட்டப்பட்டுள்ளது. அவற்றில் சிலவற்றைக் கீழே காண்போம்.

  • திருப்பாவை 29 – ஆய் ஜனன்யாசாரியர் வ்யாக்யானம் – இந்தப் பாசுரத்தில் எம்பெருமானார் மற்றும் பெரிய நம்பிக்கு இடையே நடந்த சம்பாஷணை மிகவும் அழகாக விவரிக்கப்பட்டுள்ளது. மாறனேரி நம்பியின் கடைசி நாட்களில், அவர் சரீரரீதியான இடர்பாடுகளை சகிக்க வேண்டியிருந்தது. அந்த நேரத்தில், தன்னுடைய இறுதிக் கணங்களில் தாம் எம்பெருமானைப் பற்றி த்யானிக்க முடியாதோ என்று மிகவும் வருந்தினார். அந்த நிலையைப் பார்த்த பெரிய நம்பி, எம்பெருமானாரிடம் மாறனேரி நம்பி பரமபதம் சென்றடைவாரா? என்று கேட்டார். அதற்கு எம்பெருமானார் “வராஹப் பெருமாள் முன்பே வராஹ சரம ச்லோகத்தில் உத்திரவாதம் கொடுத்துள்ளாரே! அதாவது எவன் ஒருவன் தன்னைச் சரணடைந்தானோ அவனைக் கடைசி நேரத்தில் தான் நினைத்து, தானே அவனை பரமபதத்தில் சேர்ப்பதாகக் கூறியுள்ளார்” என்றார். உடனே பெரிய நம்பி “அந்த வார்தைகளை நம்ப முடியாது, ஏனென்றால் அவன் அதை பூமிப் பிராட்டி மீது உள்ள பற்றினால் கூறியிருப்பான், அதனால் அதை ஏற்றுக்கொள்ள முடியாது” என்று கூறினார். அதற்கு எம்பெருமானார் “பிராட்டி எப்பொழுதுமே எம்பெருமானுடன் இருப்பதால், அவளை சமாதானப்படுத்துவதற்காக அவன் இந்த வார்தைகளைக் கூறியிருக்கமாட்டான்” என்றார். உடனே பெரிய நம்பி “ஒருவன் பகவத் விஷயத்திலேயே ஈடுபட்டிருந்தால் அவனுக்கு மோக்ஷம் கொடுக்கப்படும் என்று எங்கே கூறியுள்ளது? அதற்கு ப்ரமாணம் என்ன?” என்று கேட்டார். அதற்கு எம்பெருமானார், கண்ணன் எம்பெருமான் சாதித்த கீதையில் 4.10ல் உள்ள வார்தையை எடுத்துகாட்டினார் “ஜன்ம கர்ம ச மே திவ்யம் ஏவம் யோ வேத்தி தத்வத: த்யக்த்வா தேஹம் புனர் ஜன்ம நைதி மாமேதி ஸோர்ஜுன“. அதாவது எவன் ஒருவன் பகவானுடைய அவதாரத்தையும், அவனுடைய சேஷ்டிதங்களையும் உண்மையாகப் புரிந்து கொள்கிறானோ, அவனது ஜன்மத்தின் முடிவில் நிச்சயமாகப் பரமபதத்திற்குச் செல்வான். எம்பெருமானாரின் இந்த வார்தையைக் கேட்டவுடன்  பெரிய நம்பி மிகவும் மகிழ்ந்தார்.
  • பெரிய திருமொழி 7.4 – பெரியவாச்சான் பிள்ளை வ்யாக்யானம் அவதாரிகை – இந்தப் பதிகத்தில், “கண்சோர வெங்குருதி” பாசுரத்தில் , திருச்சேறை ஸாரநாதன் எம்பெருமானிடம் சரணடைந்த ஸ்ரீவைஷ்ணவர்களை மிகவும் புகழ்ந்து பேசுகிறார் திருமங்கை ஆழ்வார். இந்த இடத்தில் பெரிய நம்பி மாறனேரி நம்பிக்கு செய்த அந்திம கைங்கர்யங்களைப் பற்றி கூறப்பட்டுள்ளது.
  • முதல் திருவந்தாதி 1 – நம்பிள்ளை வ்யாக்யானம் – ஒருவர் மாறனேரி நம்பியிடம் “எம்பெருமானை மறவாதிருக்க ஏதேனும் வழி உண்டோ?” என்று கேட்க அதற்கு அவர் “எம்பெருமானை மறப்பதற்கு ஏதேனும் வழி உண்டோ?” என்று கேட்டார் (ஏனென்றால் இவர் எப்பொழுதுமே எம்பெருமானைப் பற்றி த்யானித்துக் கொண்டிருப்பதால், அவரால் எம்பெருமானை மறப்பது சாத்தியம் என்று நினைத்துக் கூட பார்க்கமுடியவில்லை).
  • ஸ்ரீவசன பூஷணம் 324 – பிள்ளை லோகாசாரியர் ஸ்ரீவைஷ்ணவர்களுடைய பெருமையை இந்த ஸூத்திரத்தில் கூறினார். குறிப்பாக ஒருவன் பிறக்கும் வர்ணத்தினால் அந்த பெருமைகள் குறையாது என்று கூறினார். பல உதாரணங்களுக்கு மத்தியில், பெரியநம்பி தான் மாறனேரி நம்பிக்கு செய்த அந்திம கைங்கர்யங்களைப் பற்றி எம்பெருமானாருக்கு விவரித்ததை எடுத்துக் காட்டியுள்ளார். மாமுனிகள் அவருடைய அழகான வ்யாக்யானத்தில் இந்த ஸம்பாஷணையின் ஸாரத்தை மிகவும் தெளிவாக விளக்கியுள்ளார்.
  • ஆசார்ய ஹ்ருதயம் 85 – அழகிய மணவாளப் பெருமாள் நாயனார், தன்னுடைய தமையனாரின் (பிள்ளை லோகாசாரியர்) அடிச்சுவடுகளைப் பின்பற்றி, மாறனேரி நம்பியுடைய பெருமையை ஒரு சூர்ணிகையில் இந்த சம்பவத்தின் மூலம் எடுத்துக்காட்டினார்.

இதன் மூலம் நாம் மாறனேரி நம்பியின் சில பெருமைகளில் சில துளிகளை அனுபவித்தோம் .

நாமும் ஆளவந்தார் மீது மிகவும் பற்றோடு இருந்த மாறனேரி நம்பியின் திருவடித் தாமரைகளைப் போற்றி வணங்குவோம்.

குறிப்பு : இவருடைய திருநட்சத்திரம் ஆடி-ஆயில்யம் என்று பெரிய திருமுடி அடைவில் காட்டப்பட்டுள்ளது, ஆனால் ஆனி-ஆயில்யம் என்று அவருடைய வாழித் திருநாமத்தில் காட்டப்பட்டுள்ளது.

மாறனேரி நம்பியினுடைய தனியன் :

யாமுநாசார்ய ஸச்சிஷ்யம் ரங்கஸ்தலநிவாஸிநம்
ஜ்ஞாநபக்த்யாதிஜலதிம் மாறனேரிகுரும் பஜே

அடியேன் ரெங்க ராமானுஜம் ராமானுஜ தாசன்

ஆதாரம்: https://guruparamparai.wordpress.com/2013/03/02/maraneri-nambi/

வலைத்தளம் – https://guruparamparaitamil.wordpress.com/

ப்ரமேயம் (குறிக்கோள்) – http://koyil.org
ப்ரமாணம் (க்ரந்தங்கள்) – http://granthams.koyil.org
ப்ரமாதா (ஆசார்யர்கள்) – http://acharyas.koyil.org
ஸ்ரீவைஷ்ணவக் கல்வி வலைத்தளம் – http://pillai.koyil.org

Advertisements

கிடாம்பி ஆச்சான்

ஸ்ரீ:
ஸ்ரீமதே சடகோபாய நம:
ஸ்ரீமதே ராமானுஜாய நம:
ஸ்ரீமத் வரவரமுனயே நம:
ஸ்ரீ வானாசல மஹாமுனயே நம:

kidambi achan

திருநக்ஷத்ரம்: சித்திரை, ஹஸ்தம்

அவதார ஸ்தலம்: காஞ்சிபுரம்

ஆசார்யன்: எம்பெருமானார்

பிறந்தபோது அவர்க்குத் திருக்கச்சி நம்பிகள் துதித்தபடி தேவப்பெருமாளின் திருநாமம் ப்ரணதார்த்திஹரன் என்பது சாத்தப்பட்டது.

இவரே திருக்கோஷ்டியூர் நம்பியால் எம்பெருமானாருக்குத் தளிகை அமுது பண்ணி சமர்ப்பிக்க நியமிக்கப்பட்டவர். இச்சரித்திரம் 6000 படி குரு பரம்பரா ப்ரபாவத்திலும் வேறு சில பூர்வாசார்ய க்ரந்தங்களிலும் அழகாக விளக்கப்பட்டுள்ளது.

kidambi achan-emperumanarஎம்பெருமானார் கத்ய த்ரயம் சாதித்து நித்ய கிரந்தமும் அருளிச் செய்து பலவகையிலும் ஸம்பிரதாய ஸம்ரக்ஷணம் செய்தபின்பும் அவர்பால் அஸூயாளுக்களாய் நின்றார் இருந்தனர் ஸ்ரீரங்கத்தில். அவர்கள் அவரது ஸித்தாந்தத்தில் தம் வேறுபாடு காரணமாக, அவர்தம் கருத்தை மறுத்துரைக்க மாட்டாமல் அவரையே முடிக்க நேரம் பார்த்து அவரது பிக்ஷையில் நஞ்சு கலந்துவிட எண்ணி அவர்க்கு பிக்ஷை இடும் பெண்மணியிடம் அவள் இடும் அன்னத்தில் விஷம் கலந்து தந்தனர்.

அவ்வில்லம் வந்த எம்பெருமானாரும் அவ்வுணவை ஏற்றார். கணவனின் இச்செயலை விரும்பாத அவள், அவர்க்கு இட்ட உணவிலிருந்து இதைத் தனியே வைத்து முகத்தில் சோகம் காட்ட ஸ்வாமி இதை உணர்ந்து அந்த அன்னத்தைத் திருக்காவேரியில் கரைத்து உபவாசம் இருந்தார். இதைக் கேள்வியுற்ற திருக்கோட்டியூர் நம்பி உடனே திருவரங்கம் வர, எம்பெருமானார் அவரை எதிர்கொண்டு அழைக்கக் காவேரிக் கரைக்கு எழுந்தருளினார். கொதிக்கும் வெயிலில் ஸ்வாமி நம்பிகள் திருவடிகளில் தண்டம் சமர்ப்பிக்க விழுந்தபோது நம்பி ஸ்வாமிப்பால் மிக்க அன்பர் யாரென அறிய அவரை எழுப்பாதிருக்க, அங்கிருந்த கிடாம்பி ஆச்சான், “ஐயோ இது என்ன ஆசார்ய சிஷ்ய வ்ருத்தி! இளந்தளிர்போல் எம்பெருமானார் சூடு மணலில் கிடக்கவும் காண ஒண்ணுமோ!” என்று ஓடிப் பரிவுடன் அவரைத் தூக்கவும், நம்பி, “ஆச்சான்! நாமும் உம்போல் பரிவார் எம்பெருமானார்க்கு யார் என்று அறியவே காத்திருந்தோம், இன்று முதல் இவர்க்கு நீரே தளிகை அமுது சமைத்து ஸமர்ப்பியும். பிக்ஷை அமுது வேண்டா” என்று நியமித்தருளினார். அன்று முதல் கிடாம்பி ஆச்சானே ஸ்வாமிக்குத் தளிகை பண்ணி ஸமர்ப்பிக்கும் கைங்கர்யம் இடைவிடாது செய்துவந்தார்.

வ்யாக்யானங்களில் கிடாம்பி ஆச்சான் தொடர்புள்ள ஐதிஹ்யங்கள்:

  • திருப்பாவை பாசுரம் 23 – பெரியவாச்சான் பிள்ளை வ்யாக்யானம்: இப்பாசுரத்தில் ஆண்டாள், ஆய்ச்சிமார் கண்ணன் எம்பெருமானிடம் தங்களுக்கு வேறு புகல்  இல்லை என்று சொல்வதாகப் பாடுகிறாள். ஆய்ச்சியருக்கு எம்பெருமான் புகலாக உளனாதலால் அவர்களுக்குப் புகல் இல்லாமலில்லை . ஒருமுறை கிடாம்பி ஆச்சான் திருமாலிருஞ்சோலை அழகரைச் சேவிக்கச் சென்றபோது அவரை அழகர் ஏதாவது மங்களாசாசனம் செய்யச் சொல்ல, அவர், ஆளவந்தாரின் “அகதிம் சரணாகதம்” எனும் ச்லோகத்தைச் சேவிக்கவும், அழகர், ”ஆச்சான்! உமக்கு எம்பெருமானார் புகலாக இருக்கும்போது அகதி என்று சொல்லிக் கொள்ளலாமோ!” என்று கடிந்தாராம்.
  • திருவிருத்தம் 99 – பெரியவாச்சான் பிள்ளை வ்யாக்யானம். ஆச்சான் காலந்தாழ்த்து வர, எம்பெருமானார் காரணம் கேட்டார். ஆச்சான், ஆழ்வானின் காலக்ஷேபம் அநுபவித்து வந்ததாகக் கூறினார். எம்பெருமானார் அங்கு என்ன நடந்தது என்று வினவினார். ஆச்சான், “ஆழ்வான் ஆழ்வாரின் பாசுரத்தைப் பாடினார். பிறந்தவாறும் என்றார், கண்ணீர் பெருக உருகி, பேச்சின்றி இருந்தார் சிறிதுபோது, பின்னர் ஓ ஆழ்வாரின் பாவம் நமக்கு வாராது இதற்கு ஒன்றும் விளக்ககம் சொல்ல முடியாது என்று காலக்ஷேபத்தை நிறுத்திவிட்டார்” என்றார். எம்பெருமானார், “ஆழ்வாரின் பெருமாள் பக்தியைவிட ஆழ்வான் ஆழ்வாரிடம் கொண்ட பக்தி மிகவும் ஆழமானது.அவர்க்கு ஆழ்வார் திருவாக்கில் இருக்கும் ஈடுபாடு அளவற்றது” என்றார்.
  • திருவாய்மொழி 4.8.2 – நம்பிள்ளை ஈடு. ஆழ்வார் எம்பெருமான் தம்மைத் தன் கைங்கர்யத்தில் ஈடுபடுத்திய கருணையை எண்ணிக் கரைகிறார். இவ்விடம் கிடாம்பி ஆச்சான் தொடர்புள்ள ஒரு ஐதிஹ்யம் காட்டப்படுகிறது. எம்பெருமானார் மடத்தில் ததீயாராதனை நடந்தபோது ஒருநாள் நடந்த விஷயம். உணவு அருந்தும்போது ஒவ்வொருவருக்கும் நீரருந்தத் தனிப் பாத்திரம் வைக்காமல், ஒரு பானையில் ஓட்டைவழியே நீர் வேண்டுவோருக்கு வார்க்கும் கைங்கர்யம் செய்துகொண்டிருந்த ஆச்சான், ஒருவர் நீர் வேண்ட, அவரிடம் எட்டி நின்று ஒரு காலை சாய்த்துக்கொண்டு பக்கவாட்டில் நின்று நீர் ஊற்ற, எம்பெருமானார், அருகில் சென்று ஆச்சான் முதுகில் தட்டி, “ஆச்சான்! நேராக நின்று நீர் சாதியும்!” என்று கடிந்துகொண்டார். நீர் சாதிக்கும்போது நேராக நின்று ஊற்றினால் சரியாக வேண்டியவர் வாயில் விழும் என்பதை ஸ்வாமி இப்படிக் காட்டினார். “பணிமானம் பிழையாமே அடியேனைப் பணிகொண்ட” என்பது இங்கு ஆழ்வார் திருவாக்கு. எம்பெருமானே, தவறுகள் நிகழாமல் அடியேன் கைங்கர்யம் செய்ய என்னைத் தடுத்துத் திருத்தினாய் என்று ஆழ்வார் திருவுள்ளம். இதை விளக்க வ்யாக்யாதா ஆச்சான் மற்றும் எம்பெருமானார் தொடர்பான இந்த ஐதிஹ்யத்தைக் காட்டுகிறார்.
  • திருவாய்மொழி 6.7.5 – நம்பிள்ளை ஈடு – ஆழ்வார் திவ்யதேச ப்ரபாவங்களைச் சொல்லும் போது, பாசுரத்தில் கண்கள் படைத்த பயனாக அவ்விடங்களில் எழிலை அனுபவிப்பதே என்று பேசுகிறார். ஆச்சானும் முதலியாண்டானும் ஒருக்கால் திருக்குடந்தை சேவிக்கக் கிளம்பி வழியில் அப்பக்குடத்தான் சந்நிதியைக் கண்டு பெரு வியப்பும் மகிழ்ச்சியும் மீதூரப் பெற்று மயங்கினர் என்கிறார் வ்யாக்யாதா.
  • திருவாய்மொழி 10-6-1 – கிடாம்பி ஆச்சான் பட்டரிடம் பெரும் ஈடுபாடும் பணிவும் கொண்டிருந்தார். ஓர் அடியார் ஆச்சானிடம்,”நீர் ஏன் பட்டரிடம் அவரது சிஷ்யர்களைவிட பக்தியோடிருக்கிறீர்?” என்று கேட்க, ஆச்சான்,”ஒரு நாள் எம்பெருமானார் சந்நிதியிலிருந்த போது பட்டர் வரவும் அவரை எம்பெருமானார் பெரிய பெருமாளிடம் கொண்டுபோய் நிறுத்தி ஒரு ச்லோகம் விண்ணப்பித்து அர்த்தம் கூற நியமித்தார். பட்டர் கூறி முடித்ததும் அவரைக் கையைப் பிடித்து வெளியே அழைத்துவந்து, எல்லாரிடமும், நீங்கள் என்னிடம் உள்ளதுபோல் இவரிடமும் நீங்கள் யாவரும் இருக்க வேண்டும் என்றார். ஆகவே எம்பெருமானார் நியமனப்படியே பட்டரிடம் பெருமதிப்புக் கொண்டுள்ளோம்” என்றார்.

கிடாம்பி ஆச்சான் மரபினரான கிடாம்பி நாயனார் மணவாள மாமுனிகளுக்கு ஸ்ரீ பாஷ்யம் கற்பித்தபோது, நாயனார் வேண்டியபடியே மாமுனிகள் அவர்க்குத் தம் ஆதிசேஷ வடிவைக் காட்டவும், அதுமுதல் நாயனார் மாமுனிகளிடம் மிகப் பெரும் மதிப்போடிருந்தார்.

பாகவத நிஷ்டையில் இருந்த கிடாம்பி ஆச்சானின் க்ருபையால் நாமும் எம்பெருமானார் அருளால் அந்நிலை எய்துவோமாக.

அடியேன் சடகோப ராமானுஜ தாஸன்

ஆதாரம்: http://guruparamparai.wordpress.com/2013/03/31/kidambi-achan/

வலைத்தளம் – https://guruparamparaitamil.wordpress.com/

ப்ரமேயம் (குறிக்கோள்) – http://koyil.org
ப்ரமாணம் (க்ரந்தங்கள்) – http://granthams.koyil.org
ப்ரமாதா (ஆசார்யர்கள்) – http://acharyas.koyil.org
ஸ்ரீவைஷ்ணவக் கல்வி வலைத்தளம் – http://pillai.koyil.org

கோயில் கொமாண்டூர் இளையவில்லி ஆச்சான்

ஸ்ரீ:
ஸ்ரீமதே சடகோபாய நம:
ஸ்ரீமதே ராமானுஜாய நம:
ஸ்ரீமத் வரவரமுனயே நம:
ஸ்ரீ வானாசல மஹாமுனயே நம:

komandur-ilayavilli-achanகொமாண்டூர் இளையவில்லி  ஆச்சான், திருநாங்கூர் செம்பொன் கோயிலில்

திருநக்ஷத்ரம்: சித்திரை, ஆயில்யம்

அவதார ஸ்தலம்: கொமாண்டூர்

ஆசார்யன்: எம்பெருமானார்

பரமபதம் அடைந்த இடம்: திருப்பேரூர்

கொமாண்டூர் இளையவில்லி ஆச்சான் எம்பெருமானாரின் தாய் வழி ஸஹோதரர். எம்பார் போலே. இளையவில்லி என்றால் லக்ஷ்மணன். லக்ஷ்மணன் ஸ்ரீ ராமனுக்குப் போல இவர் எம்பெருமானார்க்குக் கைங்கர்யம் செய்தார். பாலதன்வி குரு இவரே. எழுபத்து நான்கு ஸிம்ஹாஸனாதிபதிகளில் ஒருவர்,

இவரது தனியன், வாழித்திருநாமத்திலிருந்து இவர் பெரிய திருமலை நம்பியிடம் மிகவும் அணுக்கராயிருந்தார் என்றும் அவர்க்குக் கைங்கர்யங்கள் செய்தார் என்றும் அறிகிறோம்.

சரமோபாய நிர்ணயத்தில் (http://ponnadi.blogspot.in/p/charamopaya-nirnayam.html) நாயானாரச்சான் பிள்ளை இவரது பெருமையை விளக்கியுள்ளார்:

உடையவர் திருநாடு எழுந்தருளியபின் அடியார் பலரும் அத்துயரில் திருநாடேகினர். கணியனூர் சிறியாச்சான் சில நாள்கள் கணியூரில் இருக்க உடையவரிடம் விடைபெற்று வந்தவர், மீண்டும் உடையவரைக் காணும் ஆசையில் ஸ்ரீரங்கம் செல்லவும், வழியில் ஒரு ஸ்ரீவைஷ்ணவரைக் கண்டு “நம் ஆசார்யன் திருமேனி பாங்காய் உள்ளாரா?” என்று வினவ, அவர் உடையவர் திருநாடேகினார் என்னவும், “எம்பெருமானார் திருவடிகளே சரணம்” என்று சொல்லி, கணியனூர் சிறியாச்சான் திருநாடு புகுந்தார். கொமாண்டூர் இளையவில்லி ஆச்சான் திருப்பேரூரில் வாழ்ந்து வந்தபோது ஒரு நாள் எம்பெருமானார் ஒரு திவ்ய ரதம் ஏறுவதும், அந்த ரதம் விண்ணில் ஏறவும் பல்லாயிரவர் நித்ய சூரிகள் திரளும் ஆழ்வார்கள் நாதமுனிகள் நித்ய சூரிகள் யாவரும் மங்கள வாத்யங்கள் வாசிக்க யாவரும் பின் தொடர ஸ்வாமி பரமபதம் புகுவதைக் கனவில் கண்டார். இக்கனவை அவர் அடுத்தகத்து வள்ளல் மணிவண்ணன் என்பவர்க்குச் சொல்லி, “எம்பெருமானார் பரமபதம் எய்தியதைக் கனவில் கண்டேன், இனி அடியேன் இரேன்” என்று கூறி “எம்பெருமானார் திருவடிகளே சரணம்” என்றவாறே தாமும் திருநாடு ஏகினார்.   இவ்வாறே எம்பெருமானார் பிரிவு தாளாது பலர் திரு நாடு ஏகினர். இன்னும் பலரும் அவ்வாறு ஏகாவண்ணம் எம்பெருமானார், “எம்பெருமான் கைங்கர்யம் தொடர்ந்து நடக்க வேணும், ஆகவே யாரும் உயிர் துறக்கலாகாது” என்று நியமித்ததால் ஸம்ப்ரதாய ஸம்ரக்ஷணர்த்தமாக ஆசார்யர்கள் பலர் தரித்திருந்தனர்.

கொமாண்டூர் இளையவில்லி ஆச்சானின் பிரபாவம் அளப்பரியது. பாகவத நிஷ்டையில் அவர்தாம் நிகர் அற்று இருந்தார். எம்பெருமானாரின் அன்புக்குப் பாத்திரமாகவும் இருந்தார். நாமும் இப்படிப்பட்ட பாகவத நிஷ்டையை அவரின் திருவடிகளில் ப்ரார்த்திப்போம்.

கொமாண்டூர் இளையவில்லி ஆச்சான் தனியன்:

ஸ்ரீ கௌசிகாந்வய மஹாம்புதி பூர்ணசந்த்ரம்
ஸ்ரீ பாஷ்யகார ஜநநீ ஸஹஜா தநுஜம்
ஸ்ரீசைலபூர்ண பத பங்கஜ சக்த சித்தம்
ஸ்ரீபாலதந்வி குருவர்யம் அஹம் பஜாமி

ஆழ்வார் எம்பெருமானார் ஜீயர் திருவடிகளே சரணம்

அடியேன் சடகோப ராமாநுஜ தாஸன்

ஆதாரம்:  http://guruparamparai.wordpress.com/2013/04/03/koil-komandur-ilayavilli-achan/

வலைத்தளம் – https://guruparamparaitamil.wordpress.com/

ப்ரமேயம் (குறிக்கோள்) – http://koyil.org
ப்ரமாணம் (க்ரந்தங்கள்) – http://granthams.koyil.org
ப்ரமாதா (ஆசார்யர்கள்) – http://acharyas.koyil.org
ஸ்ரீவைஷ்ணவக் கல்வி வலைத்தளம் – http://pillai.koyil.org